車仔、拜仁、赫斯同國米，係禮拜六入面早飛比較多既四隊，其中拜仁、國米都係主場出擊，好有機會波盤皆贏，但係七連勝既赫斯作客對住防守硬淨既恩華尼斯，睇怕頂龍執人一件，講開亞洲盤，反而唔夠南錫、伯明翰甚至雷丁咁抵博。
講近況，赫斯可以話係蘇超甚至歐洲目前最弗既球隊，連埋杯賽一共七連勝，入二十一球只失四球，場場波平均入三粒，個勢簡直無與倫比，多飛係好正常D，贏波亦屬合理。只不過，今場波既莊開客讓一球，赫斯仲要偏高水，就令人有D棹忌左，畢竟恩華尼斯防守唔錯，聯賽六戰只失六球，拍住喜伯年，只係多過赫斯，如果用打死都唔出既龜縮戰術，赫斯都未必咬得佢地入，上季赫斯主場亦讓恩華尼斯一球，結果小勝一比○開個讓球和，今場波都有咁既味道，玩亞洲盤梗係吼主隊，讓球主客和就當然玩「和」。
法甲南錫對梅斯係場榜尾波，但係早飛就多過波爾多對里昂一倍有多，點解會有咁迹現象？此無他，呢類波邊個輸贏，好可能會影響到未來護級形勢，大家一定打真軍搏命，所以南錫絕對買得過，雖則馬會畀個和波賠率得2.65倍，係禮拜六全日最低。
講到樸茨茅夫對伯明翰、雷丁對克魯兩場英國波，前果場英超明顯睇到樸茨茅夫有飛升水，由2.3倍上去2.56倍，伯明翰開咧雖則五仗只贏一場，同樸茨茅夫一樣咁墮落，但係水位竟然向下移，佢地無疑輸左地利，不過受讓平半都抵博既。至於雷丁果場就相反，主勝微升之後都畀人壓番低，只係克魯W同和波係咁升，呢D格局一定係買主隊，但係呢場飛唔算多，就冇列出黎畀大家參考下。