雖然歐聯畀維拉利爾踢出局，不過格拉斯哥流浪都算衰唔晒，日前正式同JJB體育用品生產商傾掂總值達四千八百萬鎊贊助協議，有好消息沖喜，梗要贏番場波賀一賀佢。流浪主場對基爾馬諾克，主勝可以做周末套餐重心。（新電視25台及泰星UBC38台周六晚11:00直播）
冇錯，流浪係歐聯出局，但其實打得一都唔失禮，同維拉利爾苦戰兩回合都係打和，只不過因為作客入球唔及對手才被擯出局，如今歐聯正式畢業亦未嘗不是好事，至少球隊家陣可以專心向聯賽「老二」位置進發，否則，來季冇得玩歐聯搵大錢，咪一樣閉翳。
再講，流浪呢頭同新贊助商傾掂數，未來十年至少袋成四千八百萬鎊贊助費，頭就即刻歐聯出局，搞到人鬼死咁尷尬，唯一解決方法，梗係今鋪贏番場交差啦！
當然，基爾馬諾克近況唔曳，家陣排聯賽榜第五位，近六場仲要未輸過波，牌面睇流浪今勻真係唔易啃，隨時失分！不過好彩，基爾馬諾克作客成績素來麻麻，季初過流浪主場都係吞三蛋而歸，力奇實在睇唔出佢今次有乜反勝對手本錢喎！