呢排波驟冷驟熱難捉，羅賓推介一場穩陣荷甲畀大家，就係飛燕諾主場對海牙，「讓球主勝」好易開。因為飛燕諾今季專恰弱隊，海牙就畀強隊食住，一於信羅賓買番多少，單頭過關豐儉由人。（無收費電視P26周日晚6時30分直播）
今季飛燕諾主場對弱隊冇留手，對榜尾球隊最少贏兩球，贏過威廉二世、荷華高斯五六粒，絕對係殺無赦。球隊連續兩場都贏唔到波，上場仲要輸畀阿爾克馬爾，畀人坐埋個二哥位，谷埋一肚氣最搵隊弱隊發洩，海牙今次行衰運。
海牙作客強隊等
海牙呢隊波係冇骨魚腩，今季去到強隊地頭冇好收場，對榜首兩強最少都輸兩粒，今場作客聯賽「三哥」凶多吉少。今季飛燕諾作客輸過畀海牙，今場返到主場實有仇報仇。飛燕諾對上兩次主場對住海牙都能大炒對手，今場要剝「牙」絕對冇難度。
其實馬會開盤已預示今場會係大比數賽事，「讓球主客和」飛燕諾讓兩球，大細中位數推高到3.5球，入四球先算開「大」，羅賓估計今場大把波入，「大」同「讓球主勝」都有計。
