巴塞隆拿過去十六次作客意大利球隊，取得六勝六和四負。
巴塞今季十場歐聯賽事未逢一敗，取得二十一個入球只失四球，平均每場入二點一球。
今場將是AC米蘭第一百八十一場歐聯/歐冠杯賽事，若取勝的話將是他們第一百場勝仗。
AC以戰養戰主場惡慣
歐聯四強首回合激戰，AC米蘭球員身經百戰主場對巴塞隆拿稍佔上風，不難自己地頭取得領先優勢。
AC剛米蘭打派主力擊敗國米，但估唔到贏波都會被諸多批評話安察洛堤不分輕重，竟然對巴塞重要關頭前夕唔留力，仲要踢到後半段先至換走卡富、舒夫真高同派路，其實種種擔憂都係多餘，只要狀態保持得好，以戰養戰都係備戰良方，難得球員鬥心同求勝欲強，勒住而冇得發揮反而不妙，身為今季意甲「主場王」，聖西路球場發揮如魚得水，可望繼上季主場再次砌低巴塞。
巴塞如果靠朗拿甸奴單天保至尊咁就麻煩，因為佢實畀AC派人盯死，只有不停跑動帶出空位畀隊友攻門，但係軒歷拿臣對維拉利爾受傷，即使掂都會同唔少巴塞球員一樣負傷上陣，加埋迪高停賽，所以巴塞要入波都唔易，而且防線傷兵多，呢場作客唔輸算有交代。