伊朗今晚D組最後一場分組賽對安哥拉，足智彩開平手抵玩，講到底伊朗兩次出席決賽周，都無試過連輸三場執包袱，對住安哥拉應該會搏盡省番靚招牌，再講，安哥拉一味靠守，隨時連續三場無波入，似乎捧唔過！（有線61、泰星U2台及中央2台周三晚10:00直播）
打工仔同老細唔妥係大忌，球員鬧領隊當然亦唔係好消息，話說伊朗兩大星球星戴伊、卡里米唔滿意領隊艾雲高域戰術，竟然發炮話國家隊踢得太保守，前線火力唔夠搞到兩戰全敗。不過諗深一層，戴伊、卡里米躁狂都係想隊波好，踢波有火係好事，睇落伊朗會出真功夫喎。
睇番七八年、九八年兩屆決賽周，伊朗六場分組賽有一勝一和四負，點都唔算魚腩，唔通佢甘願輸畀新丁安哥拉，打爛齋缽連輸三場出局咩？應該唔會。就算中場尼古納姆、中堅戈莫哈馬迪分別因為停賽、重傷缺陣都唔怕。
干卡維斯表明續玩消極波
至於數字上話有出線機會安哥拉，實際上都應該已經執定包袱等收工，講鬥心唔會高得過伊朗。最弊係佢有中場安德里停賽，領隊干卡維斯又打算繼續用四五一守住先，諗法相當消極，想話打破連續兩場分組賽無波入走勢唔易，一句講晒要唔過！
