風流波，蠱惑多。葡萄牙咁耐冇威過，難得D組兩戰兩勝提早出線，領隊「大菲」史高拉利亦老實不客氣，話今晚鬥墨西哥收起迪高、保列達，留力十六強硬撼C組阿根廷或者荷蘭。我山度士橫睇掂睇，葡記九成九流攤放生「仙人掌」，你話我話啦，平手盤墨西哥有計！（有線63及64、中央5台及泰星U1台周三晚10:00直播）
葡萄牙依家算係歐洲二班頭、一班尾，但查實歷來入過三次決賽周咁大把，唔係得巴西籍名帥「大菲」打救，呢批葡萄都唔知幾時先到成熟時。今屆難得費高未退、迪高當打、C朗冒起，老中青三代同堂，為顧全爭盃大局，大菲講明有牌身迪高、保列達同哥斯天拿一律做座上客，費高、C朗亦好可能踢半場貨仔，咁牌面點贏波呀？我擂台重錘葡萄牙小組首名都有擔心！
荷阿晏開波走線冇路捉
兩隊領隊賽前各懷鬼胎，都話希望次圈避開大勇阿根廷，同荷蘭爭八強席位。至弊荷蘭對阿根廷大戰安排凌晨三點先踢，C組首次名未定，即係D組首名一樣有機會賴，所謂走線根本不切實際。相對葡軍談笑用兵，墨西哥就仲差一分先肯定晉級上岸，領隊拿禾比表示會原班人馬再戰，鬥心高下立見。
墨西哥雖然有件空中霸王波格迪倦勤，但鋒線有符符碌碌維拉利爾中鋒法蘭高，同埋濕水欖核奧馬巴禾，晒今場踢五三二穩守突擊，就算入唔到波應該都立於不敗之地。
