拜仁今季冇波歷克，搵個「科隆王子」普多斯基返救駕，齋計分量已經「抆」水！雖則話拜仁王朝人才輩出，但睇番近幾代領軍人物，無論級數定係成就都每況愈下，王朝沒落真係有辦你睇！打完聯賽盃兩戰冇入球，兼決賽畀爭標勁敵雲達不來梅以二比○技術性擊倒，拜仁如果今季仲可以保持上屆佳績，擁躉真係要雞還神啦！
唔好講遠，就由九十年代開始，拜仁先後試過由馬圖斯、艾芬保以及波歷克作為核心人物，巧合地佢成就好似玩緊公園滑梯咁逐步逐步跌落。最威水當然就係以隊長身份帶領德國捧走世盃通天佬官馬圖斯啦，雖然呢樣同拜仁冇乜關係，但佢亦為拜仁贏得七次聯賽冠軍及至今唯一一屆足協盃冠軍，都算係一頁值得記低威水史！
普多斯基非派牌材料
佢繼任人艾芬保國家隊仕途雖不如意，但球會就好爭氣，為拜仁○一年贏得歐聯，可以同馬圖斯分庭抗禮，兩人更壓倒波歷克雙雙入選拜仁歷來最佳經典陣容添！講起波歷克就慘啦，試過一屆面做過四料亞軍，之後轉會拜仁最多都係稱霸德甲同德國盃賽，就算畀你莊雙料冠軍最多咪做山寨王，點都唔夠兩位前輩咁巴閉啦。
到今年，普多斯基由科隆空降，令「拜仁核心」勉強叫做後繼有人，儘管佢被寄予厚望，但根據以上趨勢，拜仁想威威真係有難度。講真如果唔係今屆世盃，有幾多人睇過普多斯基踢波！況且佢都唔係做慣大「腦」，拜仁中場大窿問題根本冇解決過。一個聯賽盃已經暴露出拜仁死穴，今年條路有幾難行，大家心中有數啦！
