連踢兩場歐國盃外圍賽，最愁應該係歐洲各大“名牌”球會。因為國腳衆多，舟車勞頓有疲態，球隊備戰時間縮短，自然影響球隊雙線作戰表現。唔好忘記，歐冠盃及足協盃周中爆發，信“名牌”者，今周聯賽就要小心，睇唔通的賽事不妨選擇迴避。三劍俠今晩就揀咗兩場西甲畀大家參考。

上季排第六的切爾達今季有份踢足協盃，簽下艾拉維斯的連尼及借用皇馬的P加西亞算係球隊重要收購，不過應付雙線作戰未免不夠。今仗有中場伊連尼停賽，影響唔輕，加上首仗主場對巴塞由贏變輸，士氣受挫，連失三球的防線明顯缺態。今仗對住升班馬塔拉哥納即使冇輕敵之心，亦難免因分心足協盃有所保留，要唔落。

相反，塔拉哥納首仗作客擊敗愛斯賓奴的整體演出有驚喜，除部分時間曾一度反客為主外，踢反擊的殺傷力有板有眼。再次證明升班馬絕不好欺負，至少目前“火氣”足士氣佳，乘勇回到主場對住作客向來麻麻的切爾達，贏波爭取兩連勝唔係甚麼爆冷賽果，平手盤更有捧場價値。

同樣要分心足協盃的愛斯賓奴今周續有摩哈及達蒙度養傷，作客薩拉戈薩的戰略，相信會採用穩守突擊，以求保存更多體力應付足協盃，故爭勝心明顯不及主場出擊的薩拉戈薩。加上去季西班牙盃決賽，薩拉戈薩被一致睇好下反被愛斯賓奴擊倒，今仗復仇之心強烈。得到阿根廷孖寳艾馬及迪阿歷辛度的薩拉戈薩，攻擊力絕對有保證，只要吸取之前盃賽失利的敎訓，今仗要復仇唔係難事，主場讓半球/一球都要追主隊贏波開齋。