上周六的英超爆冷頻頻，下盤客肯定執到笑。仲未開齋的阿仙奴主場被米杜士堡逼和、紅軍作客慘呑同市死敵愛華頓三蛋，加上紐卡素在聖占士球場敗走富咸、車路士險勝查爾頓贏波輸盤，單係呢四場賽事，已經令上盤客損失慘重，季初的英超認眞古靈精怪，球迷落注時宜睇定先。

雖然英超賽果反常，不過呢個問題並冇在曼聯身上出現，周六一球擊退熱刺的紅魔鬼四戰全勝高踞榜首，即使今季“地莊”應戰依然表現標靑，入球頻頻的老將傑斯更獲選八月份英超最佳球員，費Sir膺為最佳領隊，曼聯都咪話唔威。

仲有，遲點朗尼及史高斯雙雙停賽復出，實力更趨完整的曼聯將會更惡，嚟緊周中對些路迪以及周日硬撼阿仙奴兩場硬仗，一於睇嚇強勢的紅魔鬼能否繼續過關斬將。

言歸正傳，今晩英超有場獨腳戲，由雷丁主場對曼城，主隊讓平 / 半，梗係捧曼城啦。後者兩周前力克阿仙奴，成隊波踢起曬信心，今季接收迪哥夫及哥拿迪兩名射手，攻力更勝往昔。

畢竟曼城於英超打滾多年，點會驚升班馬雷丁，何況八月頭友賽作客都贏四比一，今場再交手，單係心理上已佔盡優勢，受讓必捧。

揭幕戰響頭炮的雷丁，接着兩場均輸波而回，即使上季在英冠威到盡，但來到英超始終低一層次，根本不可相提並論。再者，傑臣有傷在身，未能排出三箭頭的雷丁攻力大減，今場要讓波博唔過，寧捧曼城好過。