日職不經不覺進行到第二十六周，仲有八周賽事就完，十二月初就會收咧。日職例牌係周末早場，唔少投注人士都會玩番多少，臨近季尾階段會出現變數，有必要重新調整投注策略，針對戰意鮮明球隊，視其為重心出擊對象，蘇豪精選兩支銀行球隊，浦和紅鑽同甲府風林現階段走勢穩步上揚，餘下賽事可視作長捧對象。
浦和紅鑽主客都咁醒
季尾時分榜首爭持激烈，浦和紅鑽表現係三強中最穩定，呢隊「日本版車路士」陣中粒粒皆星，人腳夠晒充裕，目前聯賽榜稍為帶出，主要贏在主場成績。紅鑽今季聯賽主場表現突出，踢十二場取得十一勝一和，勝出率高逾九成，長買主Ｗ好過放銀行收息。紅鑽十一場主場勝仗其中八場贏兩球以上，成績冠絕日職，屬長捧佳品。
事實上，紅鑽主場平均入座人數超過四萬，係日職當中最高，有咁多球迷捧場，難怪球隊表現咁突出。此外，紅鑽聯賽作客成績都唔曳，踢十四場贏七場，勝出率達到五成，由於佢作客上陣賠率好分過主場，都有一定博彩價值。
甲府風林主場上晒身
此外，蘇豪特意揀支另類銀行隊，升班馬甲府風林近排主場踢到上身，近七次聯賽主場五勝兩和，包括逼和紅鑽同贏飛腳，個招牌省到靚晒，班波踢起信心，特別係上屆乙組神射手亞軍巴爾，呢個箭頭有「卡士」，入球數字穩定，短期內風林再主場出擊，仍然值得捧場。 
