「冇咁大個頭，唔好戴咁大頂帽」，英超布力般流浪上屆執到個歐協盃資格，結果點樣？大家有目共睹，咪就係聯賽六場不勝，就快跌入護級漩渦咯！所以就算布力般歐協盃兩戰皆勝，都不宜過分追捧，畢竟今晚作客愈戰愈勇飛燕諾，雖則話受讓平半，但計我話上盤點都抵玩。（開賽時間：周五凌晨3:45）
從E組形勢睇，榜首布力般連挫克拉科夫同巴素利，再贏就提早出線。可惜風光背後，球隊因陣容薄弱難耐雙線作戰，顧此失彼一度英超四連敗，剛戰熱刺由贏變和再失兩分，累計馬會讓球盤經已連輸四口。疲兵接戰下，左閘尼爾腿傷倦勤，連老將米高格雷都要派上用場，隊波近三場入得一粒兼場場失波，咁攻守仲敢奢望客場搶分？
飛燕諾疊埋心水攻歐協
相反對手飛燕諾荷甲漸入佳境，正值五連勝，期間炮製十四球更由九人包辦，證明進攻處處開花。由於被榜首燕豪芬拋離八分，飛燕諾正好疊埋心水專攻歐協盃，既然首場僅和巴素利，斷估唔會重蹈覆轍放生布力般。正如飛燕諾球迷講明會「熱情待客」，驚動埋當地警方呼籲布力般擁躉好自為之，有艾馬頓倒戈的布力般怕且都係路難行咯！
