|
【明報專訊】歐洲國家盃外圍賽又打到，不過周師奶愛隊意大利例牌冇得播，搞到冇乜心情睇波，決定休息一周轉捧過氣日劇萬人迷木村場。
講起煲劇，三色台之前為迎合內地市場口味推出60集家族情仇老土劇，真係悶到乜劇都煲周師奶電視精退避三舍，好彩近排兩齣新劇有少少新意，最令周師奶驚喜係，一「粗口」竟然重出江湖，但連「麻甩佬」都被認定為粗俗字眼，相信三色台都應該收到不少投訴。大家唔好誤會周師奶鼓吹粗口文化，只係現今道德標準好多時將「教壞細路」責任推卸畀傳媒，令到唔少創作失真，變成教育電視，甚至係純賣廣告搵錢劇。其實子女係咪學壞，最主要都係出自父母同埋身邊人的教導，好似一班國奧小將最近「衰多口」問教官有冇召妓，斷估都唔係傳媒之禍！內地唔少運動員血淚史令人動容，唯獨足壇醜聞不絕，畀內地傳媒日鬧夜鬧都未見反省，唔多唔少都係一個「錢」字搞到未紅先驕，積惡多年的醜陋風氣，都唔知幾時先至淨化！中國足球令人搖頭嘆息，美國聯賽就有聲有色，就算碧咸傷多過踢，但賽會勝在懂得推廣之道，賽前嘉年華式表演夠睇頭。美國芝華士居西岸首位，面對作客10場不勝的科羅拉多急流 ，「Easy 執」啦！
■周師奶推介
主客和2串1
(5)美國芝華士勝(1.5倍) x (6)巴西勝(1.8倍)
|
