今日黃昏國際熱身賽，日本主場迎戰埃及，埃及其中九個入選球員冇，班兵落機後仲唔願操，擺明無心戀戰，憑乜贏波？日本土炮兵團夠殺，捧主W！（周三晚6時30分開賽）
九員冇到 Shopping唔操
埃及王牌前鋒美度有傷，米杜士堡當然唔肯放人，而熱刺長坐冷板賀森加利亦冇份入選，牌面睇個陣已經唔算強。另外，根據日本傳媒報道，埃及大軍飛抵日本後唔多對路，對個原定大軍名單，原來有九個球員冇到，包括漢堡射手穆罕默德施丹，大軍帶得十幾條友，相當冷清。
班埃及球員星期一落機，本來之後有課操練，但一眾球員以疲累為名，結果呢課操練亦取消埋，當地傳媒指班埃及兵似乎有多少Jet-lag，個樣已經謝謝。今次大軍有四條新丁，球隊主要由國內球會組成，照計默契唔曳，但以其抵日後備戰態度睇，有理由相信佢只係想去原宿掃貨。
日本主帥奧禪並冇召入海外軍團，防守重心田中莉王仲因傷缺陣，人腳唔算好強，不過，咁正好畀機會班國內球員爭位。射手播戶龍二同大久保嘉人獲重召，落到場肯定打甩門牙帶血吞，中場藤本淳吾見中村俊輔唔度，仲話想包辦罰球，班球員夠晒鬥心，主場出擊都有惡氣！
今年八月日本約戰喀麥隆拍跳，當時對手同樣得十幾丁友懶懶閒，結果日本淨勝兩粒，今場格局非常相似，非洲兵去到亞洲都信唔過，主勝值得一試。