今晚歐國盃F組瑞典主場鬥北愛爾蘭，前者贏波就可提早出線，加上有托弗射手伊巴謙莫域復出，對住深受傷兵及停賽問題困擾北愛，肯定要報埋首循環一敗之仇，「讓球主勝」「愛」得過！（有線62周四凌晨2:30直播）
北愛傷兵成籮
瑞典日前作客輕取列支敦士登三粒，今晚返番主場只要贏波就可提早出線，戰意非常鮮明，賽前佢仲收到好消息，就係上場停賽伊巴謙莫域刑滿復出，近排佢國米晒火，呢鋪猛虎出閘想冇「士哥」都難，更重要係，瑞典今屆外圍賽唯一敗仗就係輸畀北愛，今次對番佢唔報仇就假！
外圍賽初期係威係勢北愛爾蘭，近況已無以為繼，作客出線無望拉脫維亞同冰島都要輸，今晚作客瑞典，本來贏波仲有計出線，衰在隊長拜阿迪同前鋒費尼停賽、中場戴文莊臣又因傷落選，最慘連後艾朗曉士、基利士比亦上陣成疑，就算大希利識飛都救唔番啦！