|
法聯盃今晚上演三場十六強賽事，波童睇好三支主隊，包括較矚目馬賽主場對梅斯；馬賽季前原被視為聯賽爭標熱門，可惜出閘脫腳失分太多，目前只能在聯賽榜下游掙扎，為一嘗捧盃癮惟有在盃賽搏命，今晚主場迎戰心繫護級梅斯，主W相當穩陣。（周三凌晨4時開賽）
在聯賽排名排十八位馬賽本應要為護級而努力，但馬賽眼前目標當然唔係護級咁簡單，畢竟今季人腳唔錯，施斯、辛頓及拿斯尼級數國內都有超班味道，可惜聯賽早段失分太多，要問鼎聯賽冠軍已經係天方夜譚。不過作為唯一曾經捧走歐聯冠軍法國球隊，球會又點會甘心兩手空空？所以早前決定搵前比利時國腳吉列斯執，吉列斯上任後球隊成績明顯比季初穩定，盃賽表現更加突出，從佢目前歐聯分組賽高踞小組榜首，就知道盃賽先係佢杯茶。
南錫歐塞爾可兼顧
相反梅斯質素所限，保住甲組席位先係大前提，對盃賽爭標意欲反而唔及馬賽，梅斯上圈能夠爆冷淘汰冕冠軍波爾多出局，某程度係因為對手上半場領先一球，下半場不以為然輕敵所致，馬賽有辦睇當然唔會再大意。
同日兩場比賽，「法甲主場王」南錫主場應可輕取乙組艾米恩斯，歐塞爾、尼斯上月中曾在聯賽首循環碰頭，當時歐塞爾主場以兩球輕取對手，由該仗至今歐塞爾亦已保持連續五場主場不敗，今次再遇可睇高主隊半線。
法國盃今輪係一場過定勝負，賽和加時，再和互射十二碼。
|
