|
周二晚德國盃激戰一百二十分鐘先晉級史浩克04，話咁快又要今晚踢德甲，球員回唔切氣唔在講，最慘佢仲要傷兵一大籮，加上又要分心下周中歐聯，作客對住換上派斯尼卡做練後、聯賽只曾一敗科特布斯，根本讓唔起一球，買「讓球主勝」「04」過癮！（有線62及64周六凌晨3:30直播）
季前一心諗住同拜仁拗手瓜史浩克04，估唔到開季十一場後，只獲四勝六和一負劣績，難怪球會經理梅拿球隊上場聯賽被不來梅逼和再度失分後，亦表示心灰意冷，提早宣布退出爭標行列，話爭下屆歐聯席位仲實際！
科特布斯易帥奏效
話時話，史浩克近況真係幾曳，就算周二晚強陣出戰德國盃，最後亦要戰至加時先可以二比○淘汰漢諾威，今晚再戰德甲，話球員可以回復十足體力肯定呃你，最慘佢今場繼續有後洛迪古斯、高拜亞韋利、華利拿、奧斯爾及哈利艾天托普等因傷唔出得，被迫再次地莊應戰，加上又要分心下周歐聯主場對車路士，撐史浩克？你搵到理由咩？
暫時排榜尾科特布斯，係目前德甲唯一未勝之師，實力肯定唔及史浩克啦！之不過，佢自從九月尾改由派斯尼卡執後，四場聯賽獲三和一負，演出明顯比之前有改善。派斯尼卡為改善防守，仲由上場開始以查美爾取代比柏歷卡擔任正選門將，結果成功比勒費爾德身上搶得一分，今仗對住問題多多史浩克04，朱楓唔敢講科特布斯一定可以贏波，但要取一分開「讓球主勝」應該非常樂觀。
|
