|
筆者買波都幾鍾意打落水狗，就好似西甲華倫西亞同英超包尾大幡打比郡咁，近排都輸到甩晒轆，長反真係執到笑，不過今次佢對手都各有不足，所以決定變陣出擊，馬略卡對華倫比賽就玩「入球大」，而阿士東維拉對打比郡就博細。
其實季初階段已經覺得華倫西亞唔多對辦，近排遇到硬就即時見晒底，三連敗之餘，更夾埋失十球，相信新任頭朗奴高文都唔可以即時執番掂隊波。對手馬略卡今次主場出擊，本來可以借小島威力趁火打劫，但睇番佢近三次主場都失兩球，防守唔多穩陣，今鋪仲有門將莫亞坐波監，都咪話唔牙煙，撞華倫都有中堅艾比奧爾停賽，既然雙方都有防守主力缺陣，近期又頻頻失波，捧「入球大」似乎仲穩陣。（有線61及64周日凌晨3:00直播）
打比郡唔識入波
至於今季只係贏過一場打比郡，作客有幾唔掂，相信都唔需要多介紹，但又唔代表可以安心捧阿士東維拉「讓球主勝」，縱使佢今季曾經淨勝過車仔兩球，可惜近期鋒力唔算突出，近三場波冇一場入多過兩球，撞近五場入得一球打比郡，捧「入球細」仲抵玩啦。（now636台周六晚11:00直播）
「雙賓」弗爆讓球W要跟
最後簡簡單單提供里昂「讓球主勝」，佢近排入球停不了，近五場波最少都入兩球，前鋒「雙賓」賓艾化同賓施馬都弗到震。雖然下周要應付歐聯分組賽，不過今季三次歐聯前夕，都可以法甲炒起對手，今鋪遇上聯賽作客三連敗華倫西恩斯，里昂好大機會再上演大屠殺。（開賽時間：周日凌晨3:00）
|
