|
巴西經濟貧富懸殊，球壇亦唔例外，聖保羅提前奪聯賽冠軍，而青年人仍然為護級苦苦掙扎，今仗兩軍對碰，可以話係屬於兩個階級鬥爭。富貴聖保羅可能仲沉醉勝利之中，論戰意實唔夠發窮惡青年人，關爺力撐青年人聽朝搶晒三分。（周四早上７時45分開賽）
聖保羅可以提早捧盃，唔多唔少多得近期賽程遇弱隊，近兩仗對手利斯菲體育會同阿美利加納泰，都係今季新升班球隊，戰績差，經驗唔掂，造就聖保羅晒六分，上輪提早捧盃。奪標當然開心，不過亦係球隊最脆弱時候，因為球員心理上已經冇目標，難免會鬆懈，特別係捧完盃，更加冇心情比賽，所以呢支冠軍隊今仗表現隨時走樣。
預埋飛腳細前鋒勝
青年人為保住甲組席位，近期果然搏晒命，上仗仲作客擊敗前列強隊彭美拉斯，證明佢護級決心非常大，而今仗返主場，爭勝希望就更加大。事實上，青年人近六次主場對聖保羅，取得兩勝三和一負，絕對唔輸蝕，今場關乎生死賽事必更落力，全取三分絕對唔奇。
另外，同巴西足球淵源甚深日本，今日亦有兩場天皇盃，大阪飛腳完日聯盃冠軍，同聖保羅一樣，球員可能仲係掛住慶祝，今場對乙組中游山形山神，未必可大勝，「讓球主客和」要讓二球博唔過，而入球大細中位數調至3.5球，關爺建議要入球細。另一場川崎前鋒主場對乙組大阪櫻花，關爺始終認為捧實力較強川崎前鋒贏波較穩陣。
|
