周末孖寶半全膽由英超賽事作主導，頭關有新特蘭對紐卡素，兩隊近況同樣麻麻，加上大家防線都唔係咁穩陣，敲和波最合理，一比一、二比二好路。尾關有利物浦對富咸，紅軍歐聯大勝表現認真恐怖，不擅作客富咸應難逃大敗，博紅軍主場贏三比○同三比一數。
托利斯復出鋒力更強
升班球隊新特蘭近六場聯賽失晒分之餘，更加係場場有失波，之不過據消息指，約基、麥沙尼同卡路士艾華士等主力今仗都會復出，人腳都算幾齊整。作客紐卡素最近兩場波輸晒兼失六球，狀態唔好得去邊。考慮到英超歷史上新特蘭從未光明球場贏過紐卡素，呢場波敲和最合理。主隊射手堅韋尼鍾斯呢期腳風順，紐記亦有維度卡復出，兩邊攻擊力唔錯，博一比一或者二比二。
利物浦歐聯大炒比錫達斯八蛋，聽講費蘭度托利斯今場傷愈復出，攻擊力更加強。富咸今季作客未贏過，往績對住紅軍亦處於下風，利物浦大勝三比○、三比一應該冇難度。