最近染個頭，加埋副粗框眼鏡，人話似農夫個陸永，嘉輝度澄清，本人無意模仿任何人，如有雷同，實屬巧合！轉新形象，當然要試番新，今晚一於踩過界玩英甲，史雲斯主場鬥哈特斯菲爾德，哈軍聯賽作客接近五百分鐘冇士哥，唔識入波點贏？呢場當然要捧番史雲斯啦！（周六凌晨3時45分開賽）
哈特斯菲爾德現時位處聯賽中游，成績不過不失，不過，呢班波聯賽作客特別曳，直落連輸五場已經夠衰，仲要一個入球都冇，完全遠離水準。佢對上一個客場聯賽士哥，已經要數番去九月初贏米禾爾場，屈指一算，足足近五百分鐘冇入波。數字顯示哈軍客場攻力奇差，呢入球荒並非短時間內解決到，今場睇都係「食白果」多。
史軍近十仗不敗
睇番史雲斯，呢班波近期發揮理想，聯賽連盃賽保持十場不敗，勝在夠穩定。講主場威力，史雲斯唔算特別好，但係今場對手近況實在太曳，只要踢出應有水準，贏波不成問題。睇埋近兩季對賽成績，哈特斯菲爾德四次對住史雲斯取得三勝一和，睇落好似係一面倒佔優，不過，嘉輝一向認為數據係用畀人打破，呢場一於揀番主Ｗ！