今晚歐國盃外圍賽有多場關乎出線生死大戰，其中B組蘇格蘭主場對意大利，蘇格蘭爭出線可謂非勝不可，而意大利只要和波亦有數，阿古相信經驗豐富意大利今場唔會輕舉妄動，入波唔會多，建議捧入球細盤。（有線體育台62周日凌晨1時直播）
主隊焗攻唔多掂
歐國盃外圍賽進入最後直路階段，除要判斷各隊實力之外，仲要了解分組賽形勢，因為隨時會影響戰局變化。就好似B組咁，法國、蘇格蘭同意大利依家都有出線機會，法國十一戰得二十五分排榜首，同為十一戰蘇格蘭二十四分排第二，意大利落後蘇格蘭一分但打少一場，由於意大利最後一場對手只係魚腩法羅群島，而法國則對住出線無望烏克蘭，故蘇格蘭今仗變相一定要全取三分，先至有出線機會。
大家都知，蘇格蘭球員技術較為粗枝大葉，但防守非常穩健，故一向最煞食地方就係打穩守突擊，法國都係咁畀佢兩次搞掂，但蘇格蘭如果要搶攻，形勢就完全唔同，畢竟意大利無論人腳質素，牌面都較佢高，蘇格蘭依家攻又唔係，唔攻又唔係，隨時出現顧此失彼情況。
客軍可睇定食
意大利貴為世界盃冠軍，後防有簡拿華路同保方壓陣，前線則有東尼、迪達拿利、基拿甸奴等多個選擇，個個球員都屬世界級，關鍵時刻玩起認真上，蘇格蘭未必夠砌，但考慮到意大利和波對出線亦有利，今場要作客讓波，值博率唔算高，既然蘇格蘭攻力有限，意大利又冇必要採取主動，今場大可睇住食，一於捧入球「細」。
B組出線形勢解構
目前歐國盃B組出線形勢極之緊湊，法國、蘇格蘭同意大利之間只相差兩分，換言之一場波已可改變晒三隊排名。蘇格蘭同意大利今晚碰頭，邊隊贏就直接出線，所以蘇格蘭比「大佬」英格蘭前景較樂觀之處，就係命運仍然掌握自己手中。
至於法國只要下周中擊敗烏克蘭，就毋須理會其他賽果，甚至如果意大利今晚贏波，法國更可慳番啖氣提早出線，故今晚蘇、意之戰，有可能同時決定晒兩個出線席位誰屬。
