當日莫連奴被炒魷魚導火線，係車路士歐聯主場失分畀洛辛堡，今晚兩軍再度相遇，一眾莫帥門徒為啖氣肯定搏命，加上「藍戰士」近十二場波保持不敗，杜奧巴又傷愈復出，今仗歐聯B組分組賽誓必要殺敗洛辛堡全取三分求出線，「讓球客勝」屬明智之選！（now670台及廣東體育周四凌晨3:45直播）
車路士首循環主場對洛辛堡雖然只能夠打成一比一，不過當時正值低潮，但打到依家，車仔已經保持連續十二場波不敗，表現相當穩定，連初上任時冇人睇好格蘭都愈來愈有信心，就知車仔已回復昔日霸氣。
洛辛堡久疏戰陣
車路士上場英超清風送爽擊敗打比郡，該仗隊長泰利已復出，而據講主力射手杜奧巴亦趕及今場披甲，前線火力有一定保證。況且，只要車路士今場波全取三分就可提早出線，戰意毋庸置疑。
無疑洛辛堡歐聯成績確令人驚喜，但要留意上仗贏華倫西亞係都因對手後防失誤，以及希迪布蘭演出水準之下。由於挪威聯賽收咧，洛辛堡自擊敗華倫至今，已整整三個禮拜冇正式賽事，狀態難與車路士相提並論，今晚就算有主場之利，對住來勢洶洶車路士都係難逃一敗。