甲組聯賽首循環最後兩場賽事今午假旺角場舉行，頭場公民對愉園屬「自己友內訌」，尾場和富大埔對東方，計「卡士」東方佔優，不過球隊受傷兵停賽問題困擾，季初曾強隊身上搶到分大埔又有偷雞機會。
頭場公民同愉園關係千絲萬縷，皆因公民班主貝鈞奇同時亦係「愉園人」，而兩隊今季有球員交換舉動，沈國輝由愉園去公民，在愉園試腳失敗F馬斯奧改投公民，至於公民小將梁振邦則拒絕南華邀請而加盟愉園。
雖然兩會關係友好，但兩隊落場交手肯定唔會流攤，公民現僅落後榜首南華五分排第二，係最有機會威脅南華隊伍，今仗必拚，不過由於中堅路蘭上仗對東方因打架領紅牌，今場要停賽，大大影響球隊後防實力，小將馮啟匡將會擔大旗，希望佢頂得住愉園強攻。
東方慎防大埔發難
愉園近況復甦，在銀牌連過兩關後，目標直指四強對東方之戰，今場正好作為實力檢閱，由於梁振邦腰傷未愈，潘文迪將復出任正選，其餘位置不變。
尾場焦點係東方能否踢出水準，由於「十二碼殺手」保羅上仗對公民時領紅停賽，加上馬斯奧斷手同奧迪受傷，巴西兵團人腳緊，幾位華將有機會上陣，和富大埔近期雖連敗於南華同愉園腳下，但球隊勝在鬥志可嘉，曾擊敗愉園及賽和傑志，若然東方踢唔出水準，大埔有權搶分。
今日賽程
2:00pm 公 民 Vs 愉 園
4:00pm 和富大埔 Vs 東 方
地點：旺角場 票價：$60、$20