今日唔係周末，當然冇《捉鬼敢死隊》，不過力奇難得刮到鬼盤，梗係要同大家分享。今晚有場法甲獨腳戲，排十七位圖盧茲九場未贏過，主場對住聯賽「二哥」南錫開平手，有鬼盤味道，主隊真係有得諗！（開賽時間：周四凌晨2:00）
主隊勝在有鬥心
捉鬼盤有時真係可遇不可求，上周日力奇畀錫耶納都係抱住坐和望贏心態，唔係話最大信心，結果平手走盤唔使輸，都算正常。相比起，今場就真係鬼得多，要我數圖盧茲缺點，連續九場波未贏過、近十五場賽事贏得一場、近四次主場對南錫全部開和，同埋近六次遇南錫係錄得三和三負，簡單講，睇賽績佢點贏波先？
馬後炮容易，但講真好多時輸錢真係未必有合理解釋，有讀者打問點解邊隊強隊會輸？我夠想知點解浦和紅鑽贏唔到日職啦！賭波就係咁，永遠最多古靈精怪，試諗南錫依家排聯賽第二，出年隨時有得踢歐聯，對住尾四圖盧茲都有平手高水？
雖然今場波由初盤圖盧茲讓平半，打番落平手，表面睇唔係好現象，但除非最後南錫要掉轉讓波就另計，否則南錫唔使讓，個鬼盤格局都係冇改變。如果係要搵個撐主隊理由，上仗對波爾多半場輸三粒，最終追到輸三比四，都算有鬥心，返緊。