日職上周落幕，超哥都非常落寞，緊又少個聯賽玩，好彩，今周仲有天皇盃玩，十六強賽事正式開波，神戶勝利船主場迎戰川崎前鋒，勝利船防線天殘地缺，正選門將榎本達也同另外兩個守將因傷提早收咧，對住前鋒班火箭頭難頂，呢場大盤捧得過。（周六中午12時開賽）
勝利船打完成季聯賽，一眾球員季尾踢到殘，因而做晒容易受傷的男人，先有門將榎本達也手指骨折要抖四周，守將河本裕之亦拉傷韌帶休戰六周，另一後柳川雅樹亦因骨折倦勤，成條防線散晒，今場對住前鋒，球隊只可以能夠排出副選防線應戰，由於默契不足，防守力點都要打折扣。
本田死守開細
至於前鋒方面，南韓箭頭鄭大世狀態勁弗，已經連續三場有進帳，加埋新鮮出爐日職神射手祖尼奴，呢個鋒線組合夠晒威力。呢場波大家都冇乜壓力，預計會出現對攻場面，大盤有望順利開出。同日名古屋八鯨中立場鬥ＦＣ本田，本田防線演出硬淨，一心死守，呢場揀番細盤。