南華上周六才在銀牌四強不敵傑志，相隔唔夠一星期，兩隊今晚又在旺角場交手，進行聯賽次循環開鑼戰。上場輸波後，南華足主羅傑承以一句「咎由自取」批評球隊，球員復仇心切下，「少林寺」必醒醒定定，踢番場好波。
南華今季想囊括四冠美夢，已於上周銀牌出局而斷纜，輸波亦如當頭棒喝，證明球隊在本地波並非無敵，偶一失準就會被擊倒，雖然「少林寺」在聯賽放出，領先暫排第四傑志七分之多，不過今季聯賽同銀牌兩次交手，傑志都勝出，可謂南華「剋星」。
南華在今季首循環聯賽不敵傑志，尚可推說敗於球證枉判十二碼，但銀牌一戰傑志在戰術部署、紀律及狀態方面都壓倒南華，實牙實齒贏波，南華就冇好講。
沙域臣養傷 基斯頂上
南華今仗有中堅沙域臣因鼻骨移位養傷一個月，由剛入選省港盃港聯大軍基斯頂上，雖然基斯今季上陣機會不多，但佢係上季「三冠王」功臣之一，同隊友配合冇問題，上仗輸波罪人盧諾已轉投寶路華流浪，伊達將復任正選。
傑志亦有中堅劉全昆累積五面黃牌停賽，此子上仗夥拍耶域治成功凍結南華「野人」迪天奴，今仗劉全昆缺陣，其空缺會在李匯、林俊生及加沙當中三選一，練狄恩坦言，正為抗衡迪天奴人選感到頭痛，因為李匯及林俊生身高不足一米八，頂唔住一米八九迪天奴，至於身高一米九加沙今季只上陣兩次，而且質素一般，用佢亦相當牙煙。雖然狄恩強調暫時拋開銀牌決賽，專心踢好今仗，但面對誓師復仇南華，始終蝕底。
今日賽程
8:00pm 傑志Vs南華
地點：旺角場
票價：$60、$20（特惠票）