為遷就廣島三箭打日職附加賽，佢場天皇盃十六強賽事延至今日先開波，今日中午三箭會主場迎戰磐田山葉，山葉今季成弱旅殺手，面對聯賽榜尾三弱全數贏波，惡氣十足！三箭宣布降班後面臨星散，大軍內部亂晒龍，大莊開緊平手盤，蘇豪捧山葉折「箭」！（周六中午12時開賽）
今季山葉又中游浮到收咧，令無數粉絲大失所望，呢支老牌勁旅明顯仲係沉緊。不過，呢班波有個特性，就係欺善怕惡，對前列分子例牌冇料到，但遇弱旅就特別醒，今季聯賽面對榜尾三弱ＦＣ橫濱、甲府風林同廣島三箭，結果主、客六戰全部贏晒，成岡翔兩戰三箭都有士哥，明顯屬折「箭」能手。
三箭降班軍心大亂
三箭早前日職附加賽同乙組「三哥」京都不死鳥決戰兩個回合，最後錄得一和一負，來季肯定日乙見，生死戰都冇貨交，狀態令人擔心。球隊九月中至今聯賽連盃賽十三戰，只試過天皇盃贏過乙組仔湘南比馬，近三個月只取得一Ｗ，反映球隊缺乏贏波板斧，加上已鐵定降班，信心正處谷底。
三箭來季要踢乙組，射手佐藤壽人同烏士利先後開腔話會留隊，但並未能穩定軍心，據報陣中日本國腳駒野友一正與神戶勝利船密斟，另外，中場新星柏木陽介亦成浦和紅鑽獵物，兩人離隊機會極高，一眾主力萌生去意，隨時掀起離隊潮，大軍內部立立亂，主場出擊都信唔過，平手盤必捧山葉！