世冠盃決賽今晚於日本橫濱國際球場爆發，樂比仔今次到日本跟足兩隊全程操練，發現AC米蘭無論球員狀態、備戰態度都遠勝小保加，不過主Ｗ實在熱得過分，加上小保加決心死守，隨時頂到打加時，樂比仔認為捧入球細仲抵玩。（有線足球台61周日晚上6時30分直播）
世冠盃舉辦三屆以來，都係由南美球隊奪得，主要原因係歐洲球隊馬虎了事，備戰唔夠認真，不過AC米蘭今次備戰態度異常積極，因為佢四年前曾經洲際盃不敵小保加，報仇心態明顯。由於兩隊都係奪得最多國際賽冠軍球會（17次），如果今次稱王，就能成為真正「天下第一」，故AC球員特別提早七日到日本集訓，以適應天氣及時差。從四強對浦和紅鑽所見，AC狀態當弗，成場波控制戰局，加上兩場波都係橫濱踢，球員養精蓄銳，今場可睇高一線。
實力接近入波唔慌多
事實上，過往三屆世冠盃都係由巴西球隊奪得，巴西球隊對歐洲球隊往往格食格，但阿根廷足球源於意大利，兩隊踢法非常接近，小保加未必可剋住AC米蘭，球隊四強戰對沙希爾星隊表現令人失望，前鋒巴拉莫及柏拉斯奧雷聲大雨點小，打入決賽好夠運，佢踢完四強戰後要由東京過橫濱，又要重新適應，非常輸蝕。
不過，小保加始終有一定實力，樂比仔認為今仗捧入球細更佳，事關今屆世冠盃係歷屆入球率最少一屆，之前五場賽事，除沙巴罕所踢兩場之外，其餘三場都係一比○，可見兩支實力接近球隊交鋒時，戰情非常緊湊，呢個入球細真係好穩陣，鍾意玩波膽朋友不妨捧埋AC贏一比○。