今晚雖然有場巴塞隆拿對皇家馬德里大戰迎接平安夜，不過我會選擇純睇波，反而下晝開戰日本天皇盃博好過！ＦＣ東京同廣島三箭都係日職弱旅，今次天皇盃八強對碰，基本上係海軍鬥水兵格局，不過如果計往績同地理等客觀因素，當以三箭佔優，受讓平半必捧下盤。（周日下午２時開賽）
廣島三箭雖然於日職附加賽落敗，來季要降班，但球隊於天皇盃表現不俗，上圈更淘汰聯賽中游分子磐田山葉，而賽果仲係二比○，可見佢想踢好波番班粉絲。
相反ＦＣ東京日職收咧前五輪比賽，只到一勝一和三負，對甲府風林只靠一個十二碼贏對手，個格好似等放假咁，球員落場完全放軟晒手腳；而天皇盃雖然殺入八強，但上兩圈只係淘汰TDK SC同鳥棲砂岩呢的次級球隊，仲要險勝咋，所以今仗三箭可以睇高一線。
往績食住東京
呢場比賽中立場熊本縣舉行，三箭無得自己地頭比賽雖然係差，不過原來佢今季第一場作客勝仗，對手竟然係ＦＣ東京！而往績上，雙方由○四年開始計，近八次交手，三箭只輸過一次，呢場有得受讓就絕對有條件坐半格望收十足啦！
再者，話就話中立場，但熊本縣都好近廣島，基本上可以當半個主場；ＦＣ東京就慘囉，山長水遠到九州踢場波，舟車勞頓下想贏都難喇！