歐洲聯賽都唔知係唔係玩，上星期整晚英超Big4大戰已經緊張到抖唔到氣，今晚又係咁，米蘭打國米對AC，西班牙打巴塞對皇馬，你話仲邊使先！文迪唔理有冇得，最緊要係幫讀者贏錢！文迪睇過今晚場米蘭打資料，畀我發現呢場波和波好路喎！等我同你分析啦！（now633台及廣東體育周日晚10:00直播）
第一回合：近績
可能大家都覺得呢場米蘭打已經比以前失色，因為基本上邊隊贏都對對方冇乜大影響。今季聯賽保持不敗身國米，依家有四十分Lead住第二位羅馬七分，榜首位置都幾穩。相反AC就好似冇晒影咁，打十三場排第十一，但偏偏又畀佢輕輕鬆鬆咁贏個世冠盃，證明呢班波大賽表現仲係信得過。
結果：和
第二回合：主客場
雖則話兩隊波都共用聖西路球場，但今場編國米做主場，自然就球迷都多啦，計埋盃賽，今季國米聖西路已經十連勝，仲場場入兩球以上，都咪話唔得人驚；但對面AC冇「主場」又唔代表輸蝕喎！事關AC今季聯賽主場五和二負未贏過，反而作客就四勝一和一負，難怪AC班球員都話好彩今場係「作客」啦！一隊主場勁，一隊作客醒，點揀？
結果：和
第三回合：對賽
如果再睇番兩隊近六次打戰成績，係互相贏三場，如果淨計國米「主場」，就係國米贏兩次，AC贏三次，和一次，兩隊都冇話有絕對優勢。文迪講咁多，都係想話畀大家知，呢場波兩邊都有自己優勝之處，好難分得出邊一隊有明顯贏波優勢，與其冒險博是但一邊贏，點解唔揀有3倍和波呢？
結果：和