歐聯十六強兩日前進行抽籤，唔知大家心水球隊有冇運行呢？不過可以肯定係早排踢完歐聯分組賽球隊，由於暫時再冇後顧之憂，短期內一定有運行。今晚心水之一格拉斯哥流浪，歐聯已經出局，係時候蘇超發力，今晚作客鴨巴甸贏面壓一，1.65倍客W唔好錯過。（now825台及無收費電視25台周日晚11:00直播）
鴨巴甸都算係一條地頭龍，近十次主場保持不敗，不過其實都有唔少隱憂，首先係三日前先至歐協盃分組賽火併完哥本哈根，體力上肯定不及對手，此外，今季對住些路迪同格拉斯哥流浪兩隊班霸都係慘敗收場，擺明係欺善怕惡，今鋪再戰流浪實在唔值得睇好。
馬體會鬥希臘兵元氣大傷
其實除鴨巴甸之外，其餘有踢過上周中歐協盃球隊都幾令人擔心，馬德里體育會就係其中一隊，佢三日前同希臘彭拿典奈高斯惡鬥至比賽最後一刻，先至爭到個首名出線權，縱使挾主場四連勝走勢出擊，都有一定隱憂。
雷恩聯賽六連敗
對手愛斯賓奴上周中雖然都有踢過西班牙盃，不過一號門將卡文尼同隊長達蒙度都冇列入正選，好明顯係為今場大戰留力，再者，計埋盃賽都已經十三場未輸過，今鋪絕對有力保住不敗，開出「讓球客勝」。（有線61及64周一凌晨0:00直播）
今晚圖盧茲對雷恩法甲賽事，兩隊波都齊齊上周中歐協盃列陣，但點計都係圖盧茲數，首先佢多一日休息時間；同時，雷恩場係出線生死戰，相比起圖盧茲例行公事當然更為吃力，加上主隊射手艾文達近四場聯賽場場有波入，認真弗到漏油，實在唔難射破聯賽六連敗雷恩大門，上盤可捧。（開賽時間：周一凌晨1:00）