榜尾名家蘇豪，十二月一早霸晒聖誕四日「黃金假」，搞到班兄弟怨聲載道，已成名家公敵。雖然歎緊世界，但見擂台護級形勢不妙，佢都唔敢怠慢，主動要求做「雙對論」，要重錘出擊，望避過再度降班厄運。見冇乜人肯同佢合作，拿仁竟主動請纓，但佢唔係厚道，只係想親身貼近呢盞燈，希望撈番油水！
拿：蘇豪，聖誕假期連放幾日，咪掛住同靚靚女朋友癡纏喇，你擂台長期告急，買乜衰乜喎，閉關思過仲好啦。
蘇：我係留前鬥後，你呢凡夫俗子，識咩。今晚我就要靠條二串一翻身，醒目話跟番啦，你聖誕都跌唔少，又月尾喇，我唔想你日日捱麵包呀。
拿：成份《東方波經》，以你老哥推介最值得留意。各位讀者，如果之前未知蘇豪威力，就要快手喇，唔係下個月豪哥降班，就少盞燈你買波。
蘇：依家無謂同你拗，等我即刻送上無敵二串一推介先。基特拿係魚腩部隊，前鋒唔識入波，但呢排轉死性，近兩場一共省入五粒，今場鬥鴨巴甸將繼續數胡。鴨巴甸近八場六次開大，呢場要再追大。
拿：（細細聲）即係基特拿細啦……
蘇：另外，些路迪連續兩場聯賽贏唔到，領先優勢得番兩分，登地聯近期個勢好曳，近四場輸三場，主場都信唔過，捧1.6倍客Ｗ。
拿：收到晒！老實講我對蘇超就唔係好熟，但有你呢個嚮導，就好似茫茫大海搵到碌木一樣！今晚我知買乜喇！
侯城平手盤坐和望贏
蘇：即管寸啦！你反我咪買咁大呀，輸死你個衰仔呀！你咁醒又有乜推介呀？
拿：我鍾意侯城，主場鬥狼隊平手盤坐和望贏。狼隊近排冇乜火，近十場作客只贏得一場，侯城主場成日有神來之筆，呢次贏埋都唔出奇！