新年新希望，祝大家日日都開開心心！天皇盃決賽今午將會上演，呢場係○八年第一場馬會受注賽事，今次由小妹打頭陣，原本估計係鹿島鹿角對大阪飛腳，點知飛腳唔爭氣，今日就由鹿角同廣島三箭中立場東京國立競技場鍊過！小妹首次接觸呢個盃賽，發覺佢同部分歐洲盃賽有個共通點，即使弱旅冇群星拱照，但靠啖氣都可以踢走強敵，今日鋤強扶弱撐三箭頂住鹿角！（有線足球台61周二下午1時直播）
廣島三箭同鹿島鹿角天皇盃表現同樣積極，今次要我揀，誇張講，真係徘徊「愛與痛的邊緣」！不過，既然今屆賽事幾乎由頭爆冷爆到尾，三箭今日法定時間內頂得住又有乜出奇喎！鹿角近兩次聯賽對住三箭都成功贏波，主場次更大炒對方五比一添！到今年七月聯賽盃，兩隊再次對碰，首回合鹿角作客以○比一落敗，但次回合返主場即刻復仇，反勝三比一晉級。
晉級過程遇強愈強
鹿角話晒係今季日職冠軍，三箭就附加賽輸畀京都不死鳥，下季降班踢乙組，兩隊級數有別，出面梗係一面倒睇好鹿角啦！之不過，三箭一踢天皇盃就判若兩隊，晉級路上先後淘汰磐田山葉、FC東京同大阪飛腳，仲要全部都係九十分鐘內淘汰對手，所以小妹今場絕對唔敢睇低佢。
既然三箭四強可以淘汰飛腳，如今殺到入決賽，有力至少頂住和波踢加時，進取可以敲和波，三箭有得受讓，穩陣可捧「讓球主勝」。○八年靠三箭打頭陣，一於畀個好開始我！