踢波有時候講道氣，好似「拖肥糖」愛華頓咁，上場對阿仙奴踢得咁好依然大敗一比四，仲有阿迪達領紅出場，唔洩氣就假，今晚作客撞正有保定同艾利亞迪里復出米杜士堡，你話點讓得起平半？隨時輸埋亦唔出奇！希望米堡下盤可以為大家響起○八年頭炮！（now633台周二晚11:00直播）
米堡今季都幾難捉，可以主場擊敗阿仙奴，但又離奇不敵韋斯咸，上場畀人睇淡下作客擊敗樸茨茅夫，雖然夾雜幸運成分，但總算增強球員信心同士氣！領隊修夫基賽前話好彩得主席吉遜包容，球隊成績差時仍然繼續支持佢，畀第二個主席一早炒自己，計我話修夫基今場贏波，就係報答吉遜最好方法。
愛華頓阿迪達停賽
話時話，米堡今晚有中場悍將保定坐完波監，艾利亞迪里抖夠復任正選，加上活基治同賀夫都已先後復出坐鎮後防，前中後三線都齊腳，照計最少都有一分落袋。
至於愛華頓方面，佢上場對阿仙奴表現唔差，弊在欠缺埋門一腳，兼且阿仙奴把握較好，最後主場居然大敗一比四不特止，仲有阿迪達領紅出場，須知阿迪達今季助攻助守四平八穩，絕對唔係加維臣、菲臘積基爾卡或者卡斯利可以輕易取代，再加上射手耶高保近排射門失靈，連續四場食白果，米堡只要成功箝制卡希爾，要○八年第一擊食「糖」慶祝話咁易，受讓平半梗係支持下盤啦！