雖然話係表演性質盃賽，不過話晒入到決賽可以袋七十萬美元（約五百四十六萬港元），如果捧埋盃，一百萬美元（約七百八十萬港元）冠軍獎金更袋袋平安，除非你話國際米蘭嫌錢腥，否則我就睇好佢今晚場杜拜盃準決賽可以憑較佳質素同狀態，輕鬆砌低阿積士入決賽，今場主勝夠穩陣！（開賽時間：周日凌晨1:00）
包括國際米蘭、阿積士、史特加同國際體育會山長水遠到中東踢四角賽，除話係趁國內聯賽休假，保持狀態外，更重要係掘金。咪話力奇市儈，呢個盃賽捧盃袋一百萬美元、第二有七十萬、第三有五十萬、包尾就只得三十萬，換句話講今晚場準決賽邊個輸波，至少收少一半，你話以國米班巨星咁高人工，球會點會唔想收番筆補數先？
唔講錢，力奇同你講實力同狀態，國米係意甲班霸，歐聯分組賽輕鬆出線，歇冬前仲要打出十連勝，想搵個弱點都難。陣中一眾球星都已經先後歸隊，包括捷禾從羅馬尼亞飛杜拜，施薩索拉斯同馬爾干等巴西兵都順利由祖家趕到報到，強陣出擊，擺明對冠軍志在必得。
夫添出擊圍剿阿積士
阿積士呢邊呢？歐聯外圍賽就行人止步，國內聯賽依家只係排第三，仲要歇冬前五場只贏得一場，證明狀態唔多掂。人腳方面，練哥斯達搵二十五人出征，包括由燕豪芬重投歸隊丹麥前鋒堅尼夫佩雷斯同傷愈冇耐中場戴維斯都有隨隊，力奇唔係懷疑佢冇誠意，但想試陣味道幾濃，打硬仗真係點會夠國米砌？