英格蘭英聯盃四強次回合今晚上演「雙藍」大戰，愛華頓主場硬撼車路士，冕冠軍車仔首回合領先二比一，爭標賽道上只差一步就可以入決賽，今仗作客愛華頓大可踢最擅長穩守突擊，實行「引蛇出洞」，睇住呢粒「拖肥糖」食，以車仔十八次交手不敗驕人往績，平手盤實在抵玩到極。 （now 670周四凌晨4時直播）
愛華頓失非洲主力
車路士受非國盃及傷兵潮影響，今仗繼續有多名主將缺陣，好在車仔兵力雄厚，加上近期已習慣新陣式，近六場全勝，故「非國盃效應」對球隊實質影響唔大，反觀愛華頓有耶高保同尤保缺陣，前者係球隊首席射手，後者係後防支柱，影響較車路士更大，既然愛華頓首回合夫添都贏唔到，呢場讓「車馬炮」，更加唔係車仔對手。
車仔今仗另一優勢係首回合領先一球，令今仗形勢上更加易踢，因為車仔一向守強於攻，今仗踢擅長突擊，令安歷卡、馬隆達同史葛冼佳亞呢幾隻快馬，前線可大派用場，放乾對手後，而愛華頓本身亦唔係一支擅於強攻球隊，今仗焗住採取主動，只會令防線暴露更多空位。
近18次交手未輸過
睇番對賽往績，車仔擺明食住「拖肥糖」，近十八次交手未輸過，對上一次輸畀愛華頓，已經要追溯至八年前，平手盤值博率非常高，加上車路士班主阿布拉莫域講明要盡攬所有盃賽，連英聯盃呢隻盃仔都唔放過。
正所謂重賞之下必有勇夫，樂比仔睇好冕冠軍車路士，大有機會四年來第三度封王，近年欠缺盃賽命愛華頓今仗難成攔路虎！