意大利食硬“葡”撻

今晚有多場國際友誼賽進行，當中最有睇頭係意大利對葡萄牙，兩隊都係歐洲一線球隊，當然有得打，不過意大利始終較為睇高些少，第一有主場之利，第二前中後三線實力平均，第三具有入波本錢，所以今晚應可殺退“葡兵”。

領隊鄧納東尼一向講求實力、實際、實用，邊個有態，邊個當“弗”就可以踢國家隊，正如熱拿亞首席射手保利亞奴一樣首次入選，再加埋盧卡東尼及古亞基利亞拿幾個機會主義者，意大利鋒線實力強勁，至於中場方面，岩布仙尼、派路、迪羅斯、阿古蘭尼及柏路達等，簡直經驗與活力並重，防守穩健一向都係意大利強項，即使今仗門將由岩美利亞把關，但仍然份量十足，加上往績都係食住葡萄牙，所以意大利可以再贏一仗。

由“大飛”領軍的葡萄牙陣中冇乜驚喜，當打時期已過的迪高、比迪、文尼捷、費拉拿、簡利拿及高美士等仍係球隊的中流砥柱，似乎有過氣感覺，近兩仗對住較弱的芬蘭及阿美尼亞，明顯失去強隊本色，相信今晚繼續依賴C朗拿度及新星蘭尼支撑大局，但又撑得幾多場。

推介：意大利 2：0