|
周日碧咸率領洛杉磯銀河於香港大球場火併南華，屆時「黃金右腳」會出現挑戰者，佢就係號稱「黃金左腳」南華隊長李海強。強哥去年四十幾碼攻破利物浦大門一炮而紅，近期亦協助港聯連奪省港盃同賀歲盃，今次同碧咸交手，自言唔係「追星族」佢都忍唔住話好想感受「七旋斬」係咪咁犀利！
獲封「A貨碧咸」
李海強急勁罰球，睇開本地波球迷都見識過，南華早就封佢做「A貨碧咸」，今次同正版碧咸交手，強哥話：「我踢波從來冇崇拜對象，不過碧咸係例外，其實好多人忽略，射罰球都好講天分，而碧咸呢方面就有世界級水準。」
究竟點先可以踢出一個靚罰球，李海強指出：「最重要係落點，準繩度好多時係憑感覺，至於球速同勁度，就係靠勤力練習。」就憑呢項絕技，強哥在去年英超四角賽四十幾碼射破利物浦大門，不過佢多次謙稱自己只係「符碌」。
對於今次同碧咸交手，李海強坦言真係好合時：「近期剛好係我狀態最巔峰時期，由一月底至今我為南華上陣五場，仲有兩場賀歲盃，當中六場踢足九十分鐘，最近一場聯賽盃對東方亦踢到八十分鐘才被換出。」
有信心贏銀河
李海強指出，今次與銀河交手，同上次對利物浦最大分別，就係南華今次有機會贏：「我上次對利物浦雖然射入一球，但球隊結果大敗，銀河實力不如英超豪門強勁，我估今場有得踢，賀歲盃已證明香港足球實力，今場如踢出水準，有機會贏波而回。」 温馨提示：直接搜索“901”可以快速找到本站，获取最新资讯。
|
