德國盃四強今晚殺到，多蒙特精銳盡出主場迎戰乙組仔卡爾斯耶拿。到爭標大直路階段，「盃仔爆冷論」難以再成立，強隊於關鍵時刻會打真軍，尤其係多蒙特聯賽已冇作為，必然力爭盃賽錦標以進軍下屆歐洲賽，Mic少睇好多蒙特可淨贏兩球，要讓球主勝。（亞視本港台周三凌晨3時30分直播）
多蒙特踏入三月之後，連續三場聯賽失分，戰績一和兩負，不過睇番兩場敗仗，對手係雲達不來梅同漢堡，而且兩戰都係作客，輸波情有可原，而今仗返回主場，對手只係德乙排尾二弱隊卡爾斯耶拿，以兩隊實力差距，多蒙特冇理由再失拖。
多蒙特之前幾場聯賽成績差，好大程度上係由於傷停問題嚴重，不過踢盃賽情況就完全唔同，首先早前聯賽坐「波監」左閘戴迪同中堅羅拔高華，都可以上陣，而受肩傷困擾前鋒基利莫域斯同中場主將奇連治傷勢亦已有好轉，兩人上仗聯賽休戰，明顯係留力踢今場比賽，有埋呢兩位射得之人，多蒙特要入對手兩三粒，難度唔大。
卡爾斯耶拿分心護級
卡爾斯耶拿方面，雖然先後淘汰三支德甲球隊紐倫堡、比勒費爾德同史特加，不過有一點要留意，卡軍呢三場之中，有兩場係靠射贏十二碼，另一場亦要加時，晉級過程帶有幸運成分。而且卡爾斯耶拿依家深陷降班漩渦，球隊根本無閒分身再盃賽搏命。根據Mic少多年睇波經驗，呢類越級挑戰細球會，全靠道氣比賽，若然先失波，唔單止難扳平，往往更會兵敗如山倒，再失多幾球。
主場爆棚更利多蒙特
另外，可容納超過八萬人的韋斯科蘭球場今晚勢必爆滿，可見多蒙特球迷非常重視呢場波，球員更加唔敢流攤，屆時球場氣氛必然好澎湃，未比賽已先嚇窒卡爾斯耶拿。今場波以一場定生死，九十分鐘打和就會加時，再和就以互射十二碼分勝負。