日聯盃分組賽今午開波，橫濱水手會主場迎戰大分三神。老牌勁旅水手今季回勇，開咧兩連勝霸氣重現，巴西箭頭洛尼坐完波監復出，鋒力有增無減。三神上季兩戰水手狂吞八蛋，今場撞剋星未踢先驚，要番主W！（周四下午2時開賽）
水手沉足兩季後，今季改由桑原隆領軍，季前人腳變動唔大，巴西兵洛尼同威靈頓盧比斯來投後，球隊中前場創造力提升，兩人起到牽制作用，令隊友有更多空間發揮。水手開咧戰挫敗浦和紅鑽後，上場作客贏埋札幌岡薩多，雖然過程驚險，但能夠比賽末段反勝對手，顯示鬥心已經返晒。
三神主力養傷難發圍
水手中堅中澤佑二及中場山瀨功治有份入選日本國家隊，已出發去巴林備戰世界盃外圍賽，好彩巴西箭頭洛尼停賽期滿復出，戰鬥力得以維持。三神開咧後同樣兩戰全勝，新箭頭烏士利連續兩場有士哥，但中場新星金崎夢生爆鼻要休戰，頭查梅斯卡欲起用小將清武弘嗣，難起相同作用，加上射手高橋大輔繼續養傷，惡唔出樣！
上季兩軍聯賽兩次對壘，水手作客贏三比○，主場更慨贈對手五蛋，踢落完全冇得打。三神季初狀態雖然唔錯，但未足以反先對手，今場主勝穩陣！