今輪美職，碧咸同佢力洛杉磯銀河壓軸出場，於主場迎戰FC多倫多，銀河雖然出閘脫腳，不過反而激起鬥志，「萬人迷」上仗入波兼助攻，大踢身價波，取得漂亮勝仗。今仗對手FC多倫多只屬魚腩級，銀河梗係要趁機力爭大勝造勢，Mic少力撐銀河「讓球勝」。（now 634周一凌晨3時直播）
Mic少曾經批評銀河只係用球星作招徠搵錢，忽略足球真正意義，呢一點佢似乎已經收到，上仗面對聖荷西地震，終於踢番出正常水準，尤其係陣中兩大王牌碧咸同當路雲表現出大哥級風範各建一功，碧咸仲當選埋第二輪聯賽最佳球員。陣中其他隊友都以佢為榜樣，兩位靈魂人物有閃耀演出，對於提升全隊士氣有好大幫助。
多倫多兩仗失六球
事實上，銀河會方開始明白今時今日，齋用球星做生意招徠仲係未夠，需要成績配合，因為冇人會鍾意一支戰績不濟球隊。銀河依家球星充足，Mic少相信佢未來日子，必然會全力爭取佳績，做一支「美貌」與實力並重球隊；今場遇上弱隊FC多倫多，更加係省靚招牌好機會。
話FC多倫多係冇骨魚腩絕對無錯，佢係上季常規賽成績最差隊伍，作客更只係贏過一場。呢支加拿大兵團今季頹勢依然，聯賽兩戰兩敗合共失六球，最弊係賽程上安排佢首三仗都係作客，四圍奔波，未踢已先輸蝕，睇今場都係等捧蛋。