今晚除有英超飛，北歐波都有好路搵食，當中安高比較鍾意係瑞超卡爾馬，主場應該可以大炒加爾斯，事關主隊係瑞超爭霸分子，近排兩連勝已經撻晒，反而加爾斯實力有限，上仗反彈似係虛火居多，主勝熱得夠穩陣！（開賽時間：周二凌晨1:00）
卡爾馬係上季瑞超亞軍，今季目標早已經直指冠軍。開季以來三戰除開咧戰踢和AIK蘇納之外，近排已經漸入佳境，連續砌低隆斯基爾同奧雷布洛，陣中巴西兵諸如施薩辛甸同恩格斯頓都有貨交，今仗對住實力麻麻加爾斯，後者上次作客對住弱旅特利堡都輸一比三，點會信得過？
哈馬比受讓咪落疊
另外揀多場推介畀大家，哈馬比主場對AIK蘇納，睇舊年排名，兩班波應該係實力相當，講近況，今季都係半斤八。偏偏依家冇主場隊AIK蘇納仲要讓平半，正如我老友力奇話齋，鬼盤格局，加埋哈馬比新敗，球員信心差，客隊開齋，寧買當頭起都係捧上盤啦！（開賽時間：周二凌晨2:00）