救星到，唔怕捧！哈化柏林今晚德甲主場迎戰漢堡，唔使讓波都冇用，因為哈化有兩件食胡射手養傷，全面跌Watt唔輸都幾難，相反力爭來季歐聯入場券漢堡，有中堅馬菲臣停賽刑滿復出，可望重現鋼鐵後防風格，有佢做救世主，平手買「客勝」要趁早。（有線61周三凌晨2:00直播）
原本哈化歇冬後踢得唔錯，可惜逃唔過傷兵滿營，導致全隊演出走樣命運，王牌射手彭迪歷打柴固然係致命傷，副選前鋒拉菲爾基達奴傷埋就更麻煩，事關依家擔正安達利馬今季得兩個聯賽入球，被安排做後上前鋒艾拔就得一個士哥，靠佢兩個數胡，真係蛇都死。
馬菲臣復出防線穩陣
再講，哈化近六場得三和三負，護級壓力唔大，又冇機會爭踢歐洲賽，隨時踢風流波等收咧，淨係鬥心已經輸晒。
對家漢堡就唔同，佢要爭番入前三名踢歐聯，練史堤芬斯都想好來好去，爭奪歐聯入場券係佢離隊前最後任務，戰意肯定好過哈化好多。
雖然靈魂人物雲達華治、中場重心查洛林及左閘艾度巴要停賽，好在荷蘭中堅馬菲臣已坐完三場波監，能夠復出領導漢堡後防線，有佢睇住可以話係反彈關鍵，原因係漢堡風格守強攻弱，防守力德甲排第二，踢二十八場僅失二十一球，擺明係靠鋼鐵後防食胡，馬菲臣復出意味迪美可以重返右閘，防線回穩捧得過。