周中踢完一輪日聯盃，密密踢最驚球隊頂唔住，隨時爆到七彩。季初要數日職當弗球隊，首推名古屋鯨魚，上場收起正選箭頭科迪莊臣及玉田圭司，一樣照贏神戶勝利船，聯賽連盃賽六連勝，氣勢一時無兩，聽日主場迎戰千葉市原，主W值得捧場！（周六中午12時開賽）

鯨魚今季改由「妖精」史杜高域領軍，季前國內傳媒擔心史杜高域名大於實，不過，經過個半月時間後，球隊戰績相當標青，初步證明新帥並非有名無實。鯨魚目前於聯賽六戰不敗，以五勝一和靚績穩佔榜首，先後贏過浦和紅鑽、橫濱水手同清水心跳等實力分子，顯示球隊的確大有進步。

挪威中鋒科迪莊臣今季繼續成為鯨魚進攻重心，另外，前日本國腳玉田圭司亦生猛番，呢對高矮組合默契一流，加埋快馬杉本惠太，三叉戟威力極強。上場日聯盃史帥收起科迪莊臣同玉田圭司，結果仍能淨勝勝利船兩球，杉本惠太腳風極順，已連續三場有「士哥」，今場全力出擊，市原好難頂得住。

市原季前出現兵變，星散後戰鬥力大幅削弱，球隊目前正處重整期，短期內難有突破性演出。日本國腳卷誠一郎今季取得兩個聯賽入球，但全屬十二碼，缺乏支援情況下，卷誠一郎實在難以發揮作用。市原已經連續六場賽事輸盤，上場主場面對弱旅札幌岡薩多都贏唔到，今次勢成鯨魚點心。 

鹿角飛腳大駁火  
 
同日矚目大戰鹿島鹿角主場面對大阪飛腳，兩軍周中抖夠，鹿角上場畀浦和紅鑽終止連勝紀錄，今場矢志反彈，飛腳則重現強勁鋒力，今次兩強相遇，戰果難料，捧「大」好過！