今晚英超有六場波，阿古推介韋根對熱刺同富咸對利物浦兩場。先講韋根主場對熱刺，韋根近五次主場不敗兼冇失波，上仗逼和車路士更加軍心大振，面對大打風流波熱刺，平手盤必捧主隊。（now 632周六晚10時直播）
韋根近期戰績直線上升，其中五次主場出擊四勝一和未輸過，最難得係五場都冇失波，防線穩健已係贏波保證。上場作客車路士，領隊布魯士收起米高布朗、古馬斯等主力，擺明留力搏今場，佢目前領先尾三保頓六分，餘下四輪聯賽又有三場主場出戰，形勢大好，球員心理壓力較細，預期發揮更佳。
富咸焗攻益紅軍
熱刺自從歐洲足協盃出局，基本上已抱收咧心態，對上六場聯賽只贏一場，爭勝心好有問題，而且熱刺今季作客成績平平，十七場只贏兩場，其中一場對手仲係包尾打比郡，贏波率低到嚇死人，平手盤當然捧主隊。
富咸主場鬥利物浦，雖然紅軍下周要應付硬撼車路士歐聯四強首回合大戰，但球隊板深度夠，出副選一樣夠殺。富咸長期積弱，因為要搶分護級，今次主場出擊焗住要同對手搶攻，隨時自暴其短，益晒擅長快速反擊紅軍，阿古決定捧有1.85倍利物浦W。（now 898周六晚10時直播）