【明報專訊】臨近季尾，部分例行公事的球隊戰意難測，難怪馬會搞搞新花臣，繼續開拓新波盤路線，連不為港人熟悉的韓國聯賽及日本乙組聯賽也開盤，實行讓賭仔轉轉新口味，不用為歐洲球隊每逢季尾的疑似默契波發愁。不過周師奶確實質疑韓職及日乙的吸引力，韓劇、日劇周師奶就睇得多，但韓日球星就只識得朴智星同中村俊輔，而韓國聯賽及日乙「球星」，就真係恕周師奶見識淺陋。其實意乙同西乙都有唔少昔日名牌球隊力爭升班，好似博洛尼亞同艾拉維斯，周師奶斷估應該多人識過日乙球隊掛！但馬會偏偏擔心多蠱惑波，特別係意甲成日有江湖傳聞疑似打默契波，每逢季尾寧願封盤。

自從假波案後，意甲球隊為求自保各自修行，好似過往被指關係友好的祖雲達斯同AC米蘭，上周就打了場精彩大戰，型足10年迪比亞路同恩沙基風采依然，好睇程度就絕對不遜於英超。周師奶今晚照捧意甲，羅馬雖然未能於歐聯再進一步，但聯賽就仲有希望，托迪上仗鬧球證走得甩唔使停賽，當然要醒醒定定做好隊長本分，對住爭護級的利禾奴，相信應該會幾緊湊，讓球和就剛剛好。

■周師奶推介

星期六45 羅馬 Vs 利禾奴

讓球主客和：和局(3.5倍)