周六韓職兩支聯賽不敗之師水原藍翼同城南一和分途出擊，位居榜首水原藍翼主場迎戰弱隊濟州聯，主W可謂十拿九穩；城南一和作客蔚山現代，呢場高手過招，估計雙方會小心為上，入球細及和波皆為上乘之選。
水原藍翼今季迅速跑出，聯賽六戰取得五勝一和，平均每場起碼入兩球，最犀利係呢六場聯賽有五場冇失波，包括三場主場賽事，表現攻守兼備，以濟州聯疲弱實力又點抵擋得住呢支強勢雄師。
韓聯盃交手贏三球
其實水原藍翼同濟州聯上月中韓聯盃已經交過手，當時藍翼輕鬆以三比○取勝，已經反映雙方實力存在好大差距，相隔一個月再碰頭，估計情況唔會有大改變，藍翼有力再大勝一仗。
至於蔚山現代主場對城南一和，現代近期戰績雖不及對手，不過佢主場威力絕對唔可以小覷，今季主場仍然不敗，包括大勝上季冠軍浦項制鐵三球，可見現代面對同級強敵反而踢得特別醒神；城南一和亦正值強勢，作客想贏似乎頗有難度，但相信可保持不敗身而回。