今期膽生毛揀場英超例行公事，由韋斯咸主場迎戰紐卡素，雖然兩隊已經冇乜好爭，不過近期表現就各走極端。韋斯咸球員就好似半放假狀態，今場仲有五大中堅齊缺陣，點阻得住弗到入波入唔停奧雲？捧客勝2:0、3:1有睇頭。
睇實客勝2:0、3:1
韋斯咸依家排第十，同前面、後面隊都有五分距離，廿支球隊入面最冇爭就係佢！球隊近期表現亦毫無鬥志，上場小勝包尾魚腩打比郡終止三連敗，亦唔見有乜重大意義，反而球隊中堅位置有安頓費迪南、厄遜、加比頓、迪雲樸同史碧達齊齊受傷，以佢連續九場聯賽失波防守力，今場應該失唔止一球。
呢邊韋斯咸唔夠人防守，作客紐卡素就大打進攻足球，奧雲近六場聯賽入六球狀態大勇，近五場聯賽四勝一和亦係喜鵲今季最好走勢，作客贏波絕對冇問題，紐卡素對上三次作客韋斯咸都坐底入兩粒，今勻睇怕都走唔甩。