眾所周知，飛燕諾練雲馬維克會季尾離隊，等到歐國盃後出任荷蘭國家隊主帥，所以今晚荷蘭盃決賽主場對洛達可能係佢最後一次帶隊！一班球員自然想捧盃為頭Farewell啦，加上隊中主力相繼傷愈復出，有力擊敗洛達，主W可捧！（開賽時間：周一凌晨0:00）
聯賽收鑼日炒洛達三粒
飛燕諾球員今仗想贏波捧盃，除為歡送即將離隊練雲馬維克之外，對球隊本身亦有實際需要！因為佢今季聯賽以第六名畢業，仍然要靠附加賽爭奪來季歐協盃資格，變數多多，但今晚只要捧走荷蘭盃，就能順利得到來季歐協盃入場券，既然有「捷徑」眼前，飛燕諾點會唔搏呢？
雖然洛達亦打一樣如意算盤，不過兩隊實力明顯差一截，原因係飛燕諾有馬卡爾、蘭沙特同賀夫蘭前中後三位主力復出，試諗上仗荷甲收咧戰，飛燕諾欠缺呢三位主力都贏洛達三粒，今晚有佢復出仲得了？