睇完歐聯同歐協盃四強次回合激戰之後，最悶比賽肯定係費倫天拿對格拉斯哥流浪，由於雙方近期已經疲態畢露，加上極度怕輸，搞到演出水準以下，雙方經過一百二十分鐘「激戰」之後，返到聯賽作客出戰，恐怕會繼續失準，喜伯年同埋卡利亞里可望有機可乘。
格拉斯哥流浪互射十二碼淘汰費倫天拿之後，已經係近四場比賽之中，第二次需要加時作賽，難怪近期出現極嚴重疲態。由於較早前多場比賽因故延期，五月尾之前仲有八場比賽要應付，雖然話一心要爭歐洲四冠王，但恐怕會顧此失彼，對手喜伯年除以逸待勞之外，近七次主場更贏六仗，絕對有力做攔路虎，「讓球主勝」絕對要支持。（now825台及無收費電視25台周日晚9:00直播）
卡利亞里主場醒
至於費倫天拿方面，歐協盃四強出局之後，理應盡早忘記傷痛，一心爭取來季歐聯入場券，不過今仗對手卡利亞里絕非善男信女，近八次主場不敗，曾經賽和羅馬之餘，上仗作客準冠軍國米都只係僅輸一球，為求盡早脫離降班漩渦，肯定唔會放過踢到殘晒費倫天拿，平手盤梗係撐卡利亞里。（now634台周日晚9:00直播）
奈梅亨季尾最弗
講到踢到季尾都可以咁弗球隊，肯定要數荷甲奈梅亨，佢近十場比賽共取得九勝一和，由護級球隊躋身歐協盃附加賽行列，首回合作客洛達都照贏可也，今仗次回合返到主場，唔難再贏一仗。（開賽時間：周日晚8:30）